نبذة مختصرة : Kienu għaddew kwazi tnax-il sena (1928-1940) minn mindu bdew jibnu l-oratorju Qalb ta' Ġesu fiż-żona magħrufa bħala Tal Hmieri biex din l-opra tkun inawgurata uffiċjalment u mbierka solennament. Wasal is-Sibt 8 ta' Ġunju 1940 meta għall-ħabta tal-5:00 ta' waranofsinhar wasal Mons. Arċisqof Dom Mauro Caruana biex jagħti bidu għaċ-ċerimonja tal-ftuħ u t-tberik tal-Oratorju. Għal din l-okkazjoni nġemgħet folla imdaqqsa fil-pjazza ta' quddiemu, ilkoll bi ħrara biex ikunu xhieda ta' din il-ġrajja. Il-banda tat-tfal tal-Istitut ta' San Ġuzepp laqgħet lill-Arċisqof bid-daqq tal-Innu tal-Papa. Hekk kif daħal mir-rixtellu 'l ġewwa ġie milqugħ mill-Arċipriet tal-Mosta Dun Girgor Borg, flimkien mal-kumplament tal-kleru Mosti (Il-Mosta 139: 1990: 5). Fil-merħba li ngħatat ingħaqdu wkoll iż-żgħażagħ tal-Azzjoni Kattolika u tal-Boy Scouts bħala membri taż-żewġ għaqdiet li jiffunzjonaw fi ħdan l-oratorju. Wara l-kant tal-innijiet u ċ-ċapcip ta' merħba, l-Arcisqof Caruana, flimkien ma' Dun Karm Sciberras bħala Direttur, dar dawra mal-kumpless kollu. Huwa bierek il-klassijiet tad-duttrina u s-sala tat-teatrin u għalkemm l-iżjed li dam kien fil-kappella, din ma berikhiex għax kellha titbierek l-għada. Anthony Camilleri (1990: 14) jirrimarka li 'Mons. Arċisqof deher kuntent ħafna u għadu jingħad sal-lum li ġie biex ibierku personalment bħala sinjal ta' apprezzament u stima lejn Dun Karm Sciberras'. ; N/A
No Comments.