L-Oratorju Qalb ta' Ġesu tal-Mosta : ktieb ġdid li jirrakkonta l-ġrajja ta' dan iċ-ċentru mahbub mill-Mostin

Kien ilu jinħass il-bżonn li jkollna l-istorja tal-Oratorju Qalb ta' Ġesu ppubblikata fi ktieb b'riċerka estensiva li tagħti rendikont ta' kemm saru ħidmiet fejjieda minn dan iċ-ċentru ewlieni fil-Mosta. Tul is-snin għaddew ħafna subien u ġuvintur li minn ħdan l-Oratorju ħadu l-formazzjoni spiritwali u ċivika tagħhom u llum jinsabu jaqdu dmirhom fis-soċjeta. Kulħadd għandu kliem ta' tifħir kull meta d-diskors jaqa' fuq l-Oratorju u b'sens kbir ta' nostalġija ħafna minnhom jibdew jgħidulek xi episodju jew ieħor li jkun baqa' stampat f'moħħhom minn dawk iż-żminijiet. B'danakollu ftit li xejn kien hawn letteratura li tagħti ħjiel tal-istorja u l-bosta attivitajiet li kienu jkunu organizzati mill-Oratorju tal-Mosta. Għalkemm kien hawn xi ftit artikli mxerrdin 'l hawn u 'l hinn, iżda l-istorja sħiħa u dettaljata ta' dan iċ-ċentru kienet għadha ma nkitbitx. Għal din il-biċċa xogħol indaħal Dr Mario Thomas Vassallo, hu stess membru tal-Oratorju għal bosta snin, li għadu kemm ippubblika l-ktieb l-ġdid tiegħu, L-Oratorju Qalb ta' Ġesu tal-Mosta bl-Istorja u l-Istejjer Tiegħu. Dan huwa ktieb li għandu aktar minn 320 paġna, aktar minn 160 ritratt u indiċi tal-ismijiet li jkomplu jagħmlu din il-pubblikazzjoni aktar interessanti u kkulurita. ; N/A